BYBEL-PER-MAAND KLUB

 

 

Bybels vir die armes hierdie Kersfees

  

Armes

 

Daar sal altyd armes in jou land wees, en daarom het ek jou beveel om vrygewig te wees teenoor jou mede-Israeliet wat in nood is en arm is. (Deuteronomium 15:11) Hierdie teksvers is een van die 70 verwysings na armes in die 1983-vertaling van die Bybel en in die meeste van die teksverse word ons aangemoedig om na die armes om te sien.

Volgens Statistieke Suid-Afrika leef 30,4 miljoen Suid-Afrikaners in armoede. Een uit elke drie Suid-Afrikaners leef op 'n inkomste van minder as R797 per maand, met meer vroue in armoede as mans, en kinders en bejaardes word die swaarste getref. Vir een uit elke sewe Suid-Afrikaners beteken dit gebrek aan voedsel, hulle moet op R441 of minder per maand oorleef. Volgens die jongste beskikbare syfers is 27,7% van die ekonomies aktiewe bevolking in Suid-Afrika werkloos.

Die Bybel bring hoop maar baie mense kan nie 'n eie Bybel bekostig nie. Versoeke stroom daagliks by ons Bybelhuise in van mense wat graag 'n eie Bybel wil ontvang of van kerke wat armes daarmee wil help. Daar is 'n strategie in plek om te verseker dat die Bybels die regte mense bereik.

Hierdie projek is egter slegs moontlik indien daar fondse is. In hierdie Kersmaand vra ons julle hulp om die Bybel, die woord wat troos en hoop bring, aan die armes te kan voorsien.

Bid vir:
  • mense wat om een of ander rede nie in al hul lewensbehoeftes kan voorsien nie
  • elke persoon wat 'n eie Bybel sal ontvang.